L-Asesswalità
L-asesswalità hija orjentazzjoni sesswali, jew in-nuqqas tagħha, fejn persuna tħoss ftit jew l-ebda attrazzjoni sesswali lejn l-oħrajn. Meta persuna tidentifika hekk, ma jfissirx li hi broken jew li qiegħda żżomm lura dak li tħoss però tkun sempliċiment qiegħda tiddeskrivi dak li tħoss b’mod validu.
Bħala identità, l-asesswalità hija waħda li teżisti fuq spettru (spectrum). Xi nies asesswali qatt ma jħossu attrazzjoni sesswali waqt li oħrajn iħossuha rarament, f’ċirkustanzi speċifiċi jew b’modi li forsi mhumiex tipiċi.
Min jidentifika bħala asesswali xorta jista’ jħoss attrazzjoni romantika u imħabba flimkien m’interess f’relazzjonijiet intimi u emotional closeness ma’ nies oħra però mhux kull persuna asesswali hija l-istess f’dawn rigwardi. L-attrazzjoni sesswali hija parti waħda biss kif il-bnedmin jirrelataw ma’ xulxin, u għal nies asesswali, din m’għandiex irwol importanti.
Meta niddiskutu l-asesswalità, hu importanti li ma nħawwdux l-attrazzjoni sesswali u l-libido. Xi nies asesswali jħossu ftit jew l-ebda attrazzjoni sesswali u għandhom jew libido baxx jew m’għandhomx libido. Minn naħa l-oħra, hemm nies asesswali li xorta jħossu ftit jew l-ebda attrazzjoni sesswali imma għandhom libido aktar normali allura xorta jkollhom bżonn intrinsiku li jkollhom x’jaqsmu sesswalment mal-oħrajn anke jekk mhumiex sesswalment attirati lejhom.
L-Ispektrum:
SESS-POŻITTIV (SEX-POSITIVE): Li jkollok attitudni pożittiva lejn is-sess b'mod ġenerali. Mhux neċessarjament għalik innifsek, imma għal kwalunkwe sess sigur u kunsenswali.
SESS-NEWTRALI (SEX-NEUTRAL): Li m’għandek l-ebda opinjoni dwar is-sess b'mod ġenerali, la pożittiva u lanqas negattiva.
SESS-NEGATTIV (SEX-NEGATIVE): Li jkollok attitudni negattiva lejn is-sess b'mod ġenerali. Li taħseb li s-sess huwa ħażin, anke jekk ikun sigur u bejn nies kunsenswali.
SESS-FAVOREVOLI (SEX-FAVORABLE): Li jkollok attitudni pożittiva lejn is-sess għalik innifsek. Li tixtieq is-sess.
SESS-INDIFFERENTI (SEX-INDIFFERENT): Li m’għandek l-ebda opinjoni dwar is-sess għalik innifsek, la pożittiva u lanqas negattiva.
SESS-AVERS (SEX-AVERSE): Li jkollok attitudni negattiva lejn is-sess għalik innifsek. Li ma tixtieqx is-sess.
SESS-RIPULS (SEX-REPULSED): Li tħoss ripulsjoni jew stmerrija lejn il-ħsieb tas-sess.
-
Iva, hemm nies asesswali li jkollhom x’jaqsmu mal-oħrajn sesswalment però mhux kollha u ż-żewg risposti huma validi.
Li tkun asesswali hija purament dwar l-attrazzjoni li persuna tħoss, u mhux fuq dak li tagħmel. Persuna asesswali tista’ jkollha x’taqsam sesswalment ma’ nies oħra ħabba raġunijiet ta’ closeness, kurżità u/jew intimazija ma’ partner jew għax sempliċiment trid il-pjaċir fiżiku. Nies asesswali oħra m’għandhomx l-ebda interess fis-sess u jkunu l-aktar kuntenti mingħajru li hija ħaġa valida u naturali wkoll.
Meta persuna asesswali tagħżel li jkollha x’taqsam ma’ persuna oħra sesswalment, ma ssirx “inqas asesswali” u din l-għażla ma tagħmilx lil persuna immatura jew konfuża. L-asesswalità, bħal orjentazzjonijiet sesswali oħra, ma għandiex regoli stretti li kulħadd għandu jsegwi.
L-aktar ħaġa importanti hi li persuna dejjem tkun tista’ tagħżel dak li tħoss li trid. Is-sess qatt m’għandu jkun obbligu jew kompromess li persuna għandha taċċetta.
-
Persuna tista’ tkun asesswali u xorta tieħu pjaċir sesswalment jew b’modijiet oħra.
Hemm nies asesswali li jogħġobhom pjaċir fiżiku bħall-masturbazzjoni, meta tmisshom persuna oħra u ċerti attivitajiet sesswali mingħajr ma jħossu attrazzjoni sesswali lejn l-oħrajn. Oħrajn ifittxu l-pjaċir f’attivitajiet mhux sesswali bħal cuddling, messaġġi, intimazija emozzjonali, kreattività jew esperjenzi sensorjali (sensory).
Il-pjaċir m’għandux bilfors ikun sesswali biex ikun reali jew meaningful, u l-pjaċir sesswali m’għandux bżonn l-attrazzjoni sesswali biex ikun validu.
In-nies asesswali għandhom jitħallew jesploraw ġisimhom kif iridu, joħorġu b’boundaries biex iħossuhom komdi u jiddefinixxu l-pjaċir bit-termini tagħhom. M’għandu jkun hemm l-ebda regoli stretti fuq kif persuna tħoss l-attrazzjoni, meta tieħu pjaċir u dak li tixtieq.
-
Bħal nies oħra, persuni asesswali xorta jkollhom relazzjonijiet t’aktar minn ħbieb ma’ nies oħra. Dawn ir-relazzjonijiet jistgħu jkunu romantiċi, emozzjonali jew anke platoniċi imma xorta jkunu jfissru ħafna. Xi wħud ikunu jinkludu sess waqt li oħrajn le.
F’relazzjonijiet ma’ nies asesswali, u anke ma min mhuwiex, il-komunikazzjoni hija importanti ħafna speċjalment meta tnejn jew aktar minn nies ikollhom bżonnijiet differenti jew ikunu qed jistennew affarijiet differenti fejn jidħol is-sess. Dan ġieli jista’ jirriżulta f’relazzjonijiet inqas tradizzjonali biex kulħadd ikun kuntent. Li tkun kompatibbli ma’ persuna ma tfissirx li tkun taqbel magħha perfettament, imma tfisser li tkun tirrispetta l-limiti u x-xewqat tal-persuna l-oħra.
L-asesswalità mhijiex fażi, problema biex titranġa jew xi ħaġa kkawżata ħabba trawma, ormoni u/jew nuqqas t’esperjenza. Hija orjentazzjoni sesswali bħall-oħrajn u parti mid-diversità tal-bnedim.