Chemsex

F’din il-paġna nużaw it-terminu ‘sustanzi’ biex nifhmu diversi affarijiet. F'ħafna każijiet, it-terminu jintuża biex jiddeskrivi drogi, iżda mhux biss. Sustanzi oħra aktar disponibbli, bħall-alkoħol u l-poppers (alkyl nitrites), huma wkoll sustanzi li jistgħu jkunu perikolużi meta jitħalltu ma’ sustanzi oħra. Li tifhem l-ismijiet jgħinek tagħraf dak li qed jiġi diskuss. Dan ma jfissirx li xi waħda minn dawn is-sustanzi hija sigura - kollha jġorru riskji, speċjalment meta jitħalltu.

• Methamphetamine – spiss imsejħa Tina, Crystal, Meth, T

• Mephedrone – magħrufa bħala Meow Meow, Meph, 3-MMC, 4-MMC, 3M, 4M

• GHB/GBL – magħrufa bħala G, Gina, Liquid E

• Ketamine – spiss imsejħa K, Special K

• Cocaine – Coke, Charlie

• MDMA – Ecstasy (Pirmla), Molly

• Monkeydust – Monkey, Bath Salts, MDPV

• Amyl/Alkyl Nitrate – Poppers

Jekk m’intix ċert dwar l-effetti ta’ sustanza, fittex sorsi ta’ min jafhom dwar it-tnaqqis tal-ħsara biex tifhem l-effetti u r-riskji għas-saħħa.
Il-konsum ta’ sustanza mhux regolata iġorr riskji ogħla minħabba sustanzi oħra miżjuda (adulterants) li jistgħu jkunu tossiċi. Għalkemm f’Malta m’hemmx servizzi sħaħ ta’ ttestjar tad-droga, suġġeriment huwa li tixtri Reagent Test Kit minn fuq l-internet u tagħmel dan it-test bażiku d-dar. Madankollu, kun af li dawn it-testijiet jagħtu biss indikazzjoni tas-sustanzi attivi u mhux tal-kontaminanti kollha. Dejjem segwi r-regola tad-deheb: ibda bi ftit u bil-mod (start slow, go low).

L-ismijiet tat-triq jistgħu jqarrqu bik, partikolarment minħabba ċ-ċans ta’ sustanzi mħallta magħhom.

Il-kunsens għandu dejjem ikun ċar, volontarju, u kontinwu, anke waqt sessjoni. Peress li l-kunsens huwa proċess kontinwu, hemm sitwazzjonijiet fejn dan jieqaf, speċjalment jekk persuna ssir inkapaċi li tipprovdi dan il-kunsens. Għalhekk:

• Jekk xi ħadd ikun fis-sakra wisq jew taħt effett qawwi biex jikkomunika b’mod ċar, ma jistax jagħti kunsens.

• Iddiskuti l-limiti u l-aspettattivi qabel ma tuża s-sustanzi.

Meta tkun taħt l-effett tas-sustanzi, huwa faċli li titlef il-kont tad-dożi, tal-kondoms, jew tal-ħinijiet tal-PrEP. Bħala linja bażika ta’ sigurtà:

• Uża l-PrEP tiegħek stess — mhux ta’ ħaddieħor.

• Dejjem imġiba b’mod li l-assunzjoni tiegħek tkun li qiegħed f’riskju tal-HIV għal skopijiet ta’ protezzjoni.

• Uża kondoms meta jkun possibbli — il-PrEP tipproteġi kontra l-HIV biss, iżda ma tipproteġix kontra STIs (infezzjonijiet trażmessi sesswalment) oħra.

• Agħmel test għall-HIV 28 jum wara l-aħħar rapport sesswali li kien jinvolvi riskju.

• Agħmel screening regolari għall-STIs.

Huwa impossibbli li jkollok sess mingħajr drogi? Il-comedowns huma iebsa wisq, imma xorta ma tistax tieqaf? F’Malta hawn servizzi li jistgħu jgħinu. B’mod partikolari, nirrakkomandaw dawn l-organizzazzjonijiet li huma mħarrġa biex jindirizzaw is-sess u l-pjaċir fost diversi ġeneri:

• LGBTIQ+ Wellbeing Service - 99042015

• Rainbow Support Service - 79430009

Filwaqt li m’hemmx servizzi speċjalizzati biss għal dawk li jagħmlu chemsex, tista’ tikkuntattja lil dawn li ġejjin għal għajnuna dwar id-dipendenza fuq id-droga:

• Sedqa - 23 885 110

Ibqa’ fil-Kontroll

• Agħmel ir-riċerka tiegħek dwar is-sustanzi li tixtieq tikkonsma. Iffoka fuq kemm idumu biex jaqbdu, kemm idum l-effett, il-comedown, u l-interazzjonijiet ma’ sustanzi oħra.

• Ippjana minn qabel u ittestja s-sustanzi tiegħek. Tħallix għall-mument stess.

• Kun af il-limiti tiegħek u tiħux din bħala kompetizzjoni. Id-dożaġġ huwa relatat ma’ fatturi bħall-piż, it-tolleranza, u l-metaboliżmu, għalhekk m’għandekx bżonn tieħu daqs ħaddieħor.

• Kun af fejn qiegħed u ma’ min qiegħed.

• Ikollok pjan kif se tasal lura d-dar b’mod sigur.

• Żomm il-mowbajl iċċarġjat u l-oġġetti prezzjużi f’post sigur.

• Ibda b’doża baxxa u mur bil-mod. Il-qawwa u l-purità jvarjaw, għalhekk qatt tassumi li tista’ tiflaħ sustanza sakemm ma tkunx ippruvajt doża żgħira l-ewwel.

It-taħlit tas-sustanzi huwa wieħed mill-akbar riskji waqt iċ-chemsex. It-taħlit jista’ jkun perikoluż ħafna, u anke jekk hemm tabelli li juru kif id-drogi jinteraġixxu, jibqa’ dejjem riskju.

It-taħlit huwa perikoluż għax:

• Is-sustanzi jaffettwaw il-moħħ, in-nifs, il-qalb, u l-konxju tiegħek.

• Meta żewġ sustanzi jkollhom effetti simili, jistgħu jimmultiplikaw lil xulxin.

• Meta jkollhom effetti opposti, jistgħu jidħqu bik u jaħsbuk li qiegħed "tajjeb", u b'hekk tieħu aktar milli suppost.

• Fi spazji taċ-chemsex, in-nies jistgħu ma jiftakrux x’ħadu, u b'hekk ikun aktar diffiċli biex tikkontrolla r-reazzjonijiet.

Biex tibqa’ sigur, huwa importanti li jkollok aċċess għal apparat ta’ tnaqqis tal-ħsara, bħal pipetti biex tkejjel il-GHB, jew riga biex tkejjel il-linji ta’ sustanzi f’forma ta’ trab. Żgura li tuża l-lube tiegħek stess biex tevita r-riskju li tuża lube li jkun fih il-GHB/GBL mingħajr ma tkun taf.

Il-kits tal-ittestjar tad-droga huma legali biex jinxtraw.

Għal aktar interrazzjonijiet, irreferi għal dan is-sit.

GHB + Alkoħol = Waħda mill-aktar kombinazzjonijiet perikolużi

It-tnejn inaqqsu n-nifs u l-konxju. It-taħlit tagħhom iżid ħafna r-riskju ta’:

• Blackouts

• Remettar u fgar

• Telf ta’ sensi

• Overdose fatali li teħtieġ għajnuna ta’ emerġenza. It-taħlit tal-GHB u l-alkoħol huwa kombinazzjoni fatali. Ma nistgħux nenfasizzaw dan biżżejjed: Jekk tagħżel li tuża l-G, evita l-alkoħol kompletament u żgura li d-doża tkun inqas minn 1mg kull siegħa u nofs. Din hija KOMBINAZZJONI FATALI u ġġorr riskju għoli ħafna ta’ telf ta’ ħajja.

GHB + Ketamine (K)
It-tnejn inaqqsu l-veloċità tal-ġisem u tal-moħħ. It-taħlit jista’ jwassal għal:

• Telf f’daqqa ta’ sensi

• Konfużjoni

• Waqgħat jew korrimenti

• Diffikultà biex tieħu n-nifs

GHB + Benzos (eż. Xanax, Valium)
Kombinazzjoni oħra ta’ riskju għoli. Dawn id-drogi jsaħħu l-effetti sedattivi ta’ xulxin u jżidu b’mod drammatiku r-riskju ta’ overdose fatali.

Meth (Tina) + Mephedrone (3MMC/4MMC)
It-tnejn huma stimulanti qawwijin. It-taħlit jista’ jikkawża:

• Taħbit tal-qalb mgħaġġel / pressjoni għolja

• Ansjetà, paniku, jew paranoja

• Sħana eċċessiva u deidrazzjoni

• Strain fuq il-qalb L-istimulanti ma jikkanċellawx id-depressanti u viċi versa — sempliċement jagħmlu lill-ġisem tiegħek jaħdem aktar.

Meth (Tina) + Mediċina għall-Erezzjoni (Viagra/Kamagra/Cialis)
Din it-taħlita tpoġġi pressjoni kbira fuq il-qalb u l-vini, speċjalment waqt sessjonijiet twal. Nies fuq l-40 sena huma partikolarment f’riskju.

Monkeydust + Alkoħol
Jista’ jaħbi sinjali ta’ twissija bħal sħana żejda jew aġitazzjoni. Iżid ir-riskju ta’ deidrazzjoni, blackouts, u telf ta’ kontroll.

Monkeydust + GHB
Taħlita perikoluża ħafna. L-istimulanti jistgħu jaħbu kemm il-persuna tkun qed tistordi, u b’hekk jiżdied ir-riskju ta’ overdose, problemi tan-nifs, jew kollass f’daqqa.

Monkeydust + Kokaina/Mephedrone/Meth
Iżid b’mod sinifikanti r-riskju ta’ problemi tal-qalb, paniku, paranoja, sħana żejda, u psikosi.

Kokaina + Alkoħol
Il-ġisem joħloq kimika msejħa cocaethylene, li hija aktar tossika għall-fwied u l-qalb milli l-kokaina waħedha.

Kokaina/Kafè/Energy Drinks + Ketamine
Il-kaffeina u l-kokaina huma stimulanti. In-nies jassumu li jekk xi ħadd qed jieħu overdose tal-K, il-kokaina jew il-kaffeina se jgħinuhom jistejqru. Din hija kombinazzjoni riskjuża ħafna li għandha tiġi evitata.

Poppers + Mediċina għall-Erezzjoni (Viagra/Kamagra/Cialis) Kombinazzjoni perikoluża immens.

It-tnejn jirrilassaw u jwessgħu l-vini. It-taħlit tagħhom jista’ jikkawża:

• Tnaqqis f’daqqa u serju fil-pressjoni tad-demm

• Ħass ħażin jew kollass

• Attakk tal-qalb jew puplesija

• Telf ta’ sensi Din il-kombinazzjoni tista’ tkun fatali, anke għal nies li huma f’saħħithom.

Poppers + Stimulanti (Cocaine / Meth / Mephedrone / Monkeydust)

Il-poppers iżidu r-rata tal-qalb u jnaqqsu l-pressjoni malajr, filwaqt li l-istimulanti jgħollu r-rata tal-qalb u l-pressjoni. Flimkien jistgħu jikkawżaw:

• Taħbit tal-qalb irregolari

• Uġigħ fis-sider

• Sturdament jew ħass ħażin

• Pressjoni żejda fuq il-qalb

Poppers + Alkoħol

L-alkoħol ukoll inaqqas il-pressjoni u jaffettwa l-koordinazzjoni. It-taħlit jista’ jwassal għal sturdament, waqgħat, remettar, u deidrazzjoni.

• Taqsamx għodod biex tixmomm (snorting tools).

• Taqsamx apparat tal-injezzjoni — il-qsim iġorr riskju għoli ta’ HIV, epatite C, u infezzjonijiet batterjali.

• Jekk xi ħadd qed jinjetta fl-istess spazju, evita li tuża kwalunkwe ħaġa mill-ġdid, anke darba biss.
  

Jekk xi ħadd ma jirrispondix, qed jieħu n-nifs bil-mod, jew qed jitlef is-sensi, ċempel il-112 immedjatament (emerġenza). Sakemm l-overdose ma tkunx fatali, m’hemm l-ebda riskju ta’ konsegwenzi legali. Dan ifisser li m’għandekx tistenna sakemm ikun tard wisq, u għandek iċċempel għal ambulanza immedjatament. Għid x’sustanzi taħseb li l-persuna tkun ħadet. Dan jista’ jiffranka l-ħin u jsalva ħajja.

Li titlef il-kont tal-ħin jew tal-ammont ta’ sustanzi kkunsmati huwa komuni. Issettja reminders fuq il-mowbajl biex tiċċekkja lilek innifsek u lil ħaddieħor..

Speċjalment jekk hemm stimulanti involuti - is-sħana żejda hija riskju komuni. Ixrob ħafna ilma u l-frott huwa tajjeb ħafna.

• L-istimulanti jżidu l-għaraq u jnaqqsu s-sens ta’ għatx.

• Sessjonijiet twal + żfin + sess jgħollu t-temperatura tal-ġisem.

• Id-deidrazzjoni żżid il-pressjoni fuq il-qalb u l-kliewi.

Bażi ta’ idratazzjoni tajba:

• Ixrob l-ilma ftit ftit u b’mod regolari.

• Ħu pawżi biex tiskonnettja u tistrieħ jekk tħossok sħun wisq.

• Ixrob b’kawtela: L-alkoħol u l-energy drinks jistgħu jżidu d-deidrazzjoni u l-pressjoni fuq il-qalb.

Ikel Qabel u Wara

L-ikel jgħin l-enerġija, il-burdata, u l-irkupru.

• Qabel: Ikla bilanċjata b’karboidrati u proteini (eż. ross, għaġin bil-ħaxix, bajd, jogurt).

• Waqt: Snacks żgħar bħal frott, soppa, jew smoothies jekk ikollok aptit.

• Wara: Ixrob l-ilma l-ewwel, u mbagħad kul ikel bi proteini u elettroliti meta jerġa’ jiġik l-aptit biex tgħin lill-ġisem jirkupra.

Jekk ma tikolx għal ħin twil, jista’ jiżdied l-isturdament, l-ansjetà, u s-sintomi ta’ wara (crash).