BDSM

Ser nibdew billi niċċaraw kunċetti żbaljati dwar il-BDSM li jaf jeżistu. L-ewwel nett, Il-BDSM mhux abbużiv, mhux vjolenti u ma jsirx mingħajr kunsens. Fil-fatt, BDSM tajjeb isir biss f’ambjent f’saħħtu ta’ kunsens, fejn kull min hu involut ikun ikkomunika tajjeb, u jkun sar qbil minn qabel dwar dak kollu li jkun ser jiġri waqt il-logħob, jew ġieli anke fil-ħajja ta’ kuljum. (Aqra aktar fis-sezzjoni dwar in-Negozjar dwar dan).

• Prattikanti attivi u responsabbli tal-kink ma jiħdux dan l-istil ta’ ħajja b’mod superfiċjali, u jagħmlu riċerka u ifittxu tagħlim kontinwu qabel, u anke matul, is-sessjonijiet tagħhom. Huma jikkomunikaw b’mod kostanti biex jiżguraw li s-sieħeb jew is-sieħba tagħhom jibqa’ sigur jew sigura f’kull ħin.

  Xi kunċetti żbaljati li għandhom jiġu ċċarati huma:

• Il-BDSM huwa abbużiv ❌ Il-BDSM m’hux abbusiv, u iseħħ biss wara li jkun sar in-negozjar, b’kunsens u b’limiti miftiehma, partikolarment mill-parti sottomessa. Il-BDSM m’għandux iseħħ mingħajr dawn il-prinċipji.

• Fil-BDSM m’hemmx bżonn kunsens ❌ Fil-BDSM, kull attività u aspettattiva huma bbażati fuq il-kunsens. Ir-relazzjon tinbena fuq il-fiduċja bejn il-persuni involuti.

• Il-BDSM huwa sinjal ta’ trawma ❌ Il-BDSM mhux trawmatiku u mhux sinjal ta’ trawma. Fil-fatt, in-negozjar u d-diskussjonijiet qabel is-sessjoni għandhom jinkludu diskussjoni dwar xi trawmi li jista jkun hemm, sabiex jiġi evitat li dawn jerġgħu jitfaċċaw u biex kulħadd jibqa’ sigur. Nies minn kull qasam tal-ħajja jidħlu fil-BDSM għal raġunijiet differenti, u mhux neċessarjament minħabba trawma.

• Il-BDSM huwa vjolenti ❌ Il-BDSM mhux vjolenti. Għalkemm xi attivitajiet jistgħu jidhru aktar intensi jew riskjużi, kull aspett għandu jkun ġie miftiehem minn qabel u l-partijiet qatt m’għandu jkollhom riskju ta’ saħħa.

• Il-BDSM irid jogħġob lil kulhadd ❌ Il-BDSM mhuwiex għal kulħadd, u persuni li mhumiex interessati m’għandhom qatt jiġu ppressati biex jipparteċipaw.

• Il-BDSM huwa kompetizzjoni ❌ L-ebda sessjoni jew attività mhi kompetizzjoni. Il-BDSM għandu jseħħ f’ ambjent kunsenswali bejn persuni wara li jkun sar qbil ċar bejniethom.

• Il-BDSM huwa dejjem sesswali ❌ Il-BDSM mhux bilfors ikun sesswali. Xi persuni jipparteċipaw fil-BDSM sabiex jaħarbu mir-realtà, jew bħala mument fejn jistgħu jitilqu mill-irwoli ta’ kuljum u jesprimu naħa differenti tagħhom infushom. Il-BDSM jista’ jieħu forom differenti, bħal skambju ta’ poter, esperjenzi sensorji, espressjoni personali, jew biex jinbena livell akbar ta’ fiduċja u konnessjoni emozzjonali.

Fil-qalba tagħha, il-komunità BDSM hija mibnija fuq il-komunikazzjoni, il-kunsens, il-fiduċja u r-rispett reċiproku. In-negozjar u l-istabbiliment ta’ limiti ċari huma meqjusa bħala l-punt tat-tluq ta’ kull tip ta’ relazzjoni. Li tgawdi l-BDSM ma jagħmilkx persuna estrema. Li ma tgawdihx ma jagħmlikx persuna boring.

L-ittri “BDSM” spiss jintużaw biex jiddeskrivu elementi differenti li jistgħu ikunu preżenti:

Bondage u Discipline/dixxiplina

Il-bondage jista’ jieħu diversi forom differenti, skont it-tagħmir użat, bħal ħbula, restraints, cuffs, tape u xi oħrajn. Huwa ġej mill-idea li l-persuna sottomessa tkun fiżikament ristretta.

Id-dixxiplina hija mibnija fuq id-dinamiki ta’ Dominance/Submission (ara hawn taħt) u fuq il-kunċett ta’ Total Power Exchange (TPE). Dawn huma bbażati fuq regoli u protokolli li ż-żewġ partijiet ikunu qablu li jsegwu minn qabel. Bħala parti minn dawn ir-regoli, jiġu stabbiliti protokolli li għandhom jiġu osservati, kif ukoll konsegwenzi f’każ li l-imġiba miftiehma ma tiġix segwita.

Dominanza u Sottomissjoni

Id-Dominant/Dom hija l-persuna li tmexxi d-dinamika, toħloq ir-regoli u tagħti ordnijiet sabiex tipprovdi struttura u bilanċ ta’ kontroll li jxaqleb favur id-Dom. Id-dominanza mhijiex abbuż ta’ poter, iżda trasferiment ta’ poter miftiehem bejn iż-żewġ partijiet, li permezz tiegħu s-sottomess/sub jagħti l-poter fi ħdan il-limiti miftiehma.

Is-sottomess/sub j/timxi mar-regoli u l-ordnijiet tad-Dom. Xi nies jiddeskrivu s-sottomissjoni tagħhom bħala xewqa, filwaqt li oħrajn jarawh bħala bżonn.

Hi x’inhi l-motivazzjoni, ir-regoli kollha għandhom jiġu miftiehma minn qabel, b’rispett sħiħ lejn il-limiti ta’ kull persuna u b’enfasi fuq is-sigurtà tas-sub matul is-sessjonijiet, sitwazzjonijiet ta’ konsegwenza, jew “punishments”.

Sadiżmu u Masokiżmu (S&M)

Is-sadiżmu hija xewqa li toħloq skumdità għal persuna oħra, sabiex jinkiseb sens ta’ pjaċir. Tekniki użati jistgħu jwasslu għal uġigħ fiżiku jew umiljazzjoni psikoloġika. Għalkemm dan japplika għall-BDSM b’mod ġenerali, speċjalment fil-każ tal-S&M, l-attivitajiet għandhom dejjem iseħħu f’ambjent ta’ kunsens sħiħ, b’limiti stabbiliti u miftiehma minn qabel. L-għan mhuwiex li tweġġa’, iżda li jinħoloq sens ta’ ewforija erotika tal-ġisem, li jżid is-sensittività u l-pjaċir.

Il-mażokist, min-naħa l-oħra, huwa l-kontroparti li tagħti l-kunsens u tistabbilixxi l-limiti. Permezz tal-S&M, il-mażokist jikseb pjaċir mis-sensazzjonijiet ikkawżati mis-sadist. Dawn jistgħu jinkludu logħob bit-temperatura, impatt, pressjoni, deprivazzjoni sensorjali (bħal blindfolds jew earplugs), jew overload sensorjali (bħal mużika qawwija u dawl intens).

Mhux kull min igawdi l-BDSM jidentifika ma’ dawn l-aspetti kollha. Ħafna nies jinvolvu ruħhom f’aspett wieħed biss, jew f’xi wħud minnhom.

Ir-rwoli fil-BDSM mhumiex marbuta mal-ġeneru, l-orjentazzjoni sesswali jew il-mod ta’ kif persuna tippreżenta ruħha. Xi komunitajiet queer ilhom ħafna jużaw il-kink bħala spazju biex jesploraw l-identità u l-poter. Tista’ tkun esperjenza ta’ serħan (healing), fejn wieħed jesplora dinamiċi tal-poter fis-soċjetà b’mod sigur u kunsenswali.

Xi distinzjonijiet komuni bejn termini użati fil-BDSM u termini li mhumiex parti mil-vokabolarju tal-BDSM jinkludu:

• Top / Bottom: Jiddeskrivu min qed jagħmel l-azzjoni, mhux min għandu l-kontroll.

• Dominant / Submissive: Jiddeskrivu l-awtorità u l-poter, mhux it-teknika.

• Switch / Vers: Persuni li jgawdu rwoli differenti skont il-kuntest jew is-sieħeb/sieħba.

• Termini oħra: Dawn it-termini jistgħu jinqalbu bil-Malti, pero huma aktar magħrufa bl-Ingliż. Dawn ir-rwoli jesprimu personalità, enerġija, ġeneru jew vibe erotika, u mhux maturità jew parentela letterali.

  • Daddy, Sir, Master

  • Mummy, Ma’am, Femme Domme, Dominatrix

  • Handler/Pup

  • Boi, Brat

Xejn minn dan m’hu obbligatorju. Dawn huma sempliċiment għodod li jintużaw minn parteċipanti tal-BDSM jesprimu lilhom infushom.

Ħafna prattiċi tal-BDSM jinvolvu element ta’ skambju ta’ poter. It-terminu ‘skambju’ huwa importanti għax ifisser li l-poter mhux jittieħed, imma jingħata b’kunsens. Il-persuna sottomessa tikkontrolla aspett fundamentali ta’ dan il-poter billi tagħżel li toffrih. Il-persuna dominanti, malli taċċetta, hija responsabbli li timmaniġġjah b’attenzjoni u b’għożża.

L-Iskambju ta’ Poter jista jkun:

• Temporanju jew aktar dejjiem

• Sesswali jew mhux sesswali

• Strutturat jew bla struttura (fluwidu)

Hawn min jippreferi rwoli ċari. Oħrajn ma jiddejqux jibdlu. Għal xi uħud din it-tip ta’ dinamika tal-poter hija purament fantasija, u m’għandhom l-ebda intenzjoni li jattwawha fil-verita. Dan kollu huwa validu.

Il-kunsens fil-BDSM għandu jkun intenzjonat (deliberate) u espliċitu. Għalkemm il-kunsens fis-sess huwa dejjem importanti, fil-każ tal-BDSM huwa saħansitra aktar kruċjali. Dan għaliex il-BDSM jista’ jinvolvi sitwazzjonijiet ta’ vulnerabbiltà, intensità, jew riskju. Huwa għalhekk li l-komunikazzjoni ċara hija daqstant importanti.

Huwa essenzjali li tagħraf u tesplora l-limiti tiegħek stess qabel ma tinvolvi ruħek ma' ħaddieħor, sabiex tkun tista' tagħti kunsens b’entużjażmu għal attività partikolari. Waqt il-logħob tal-BDSM, il-kelma “forsi” (maybe) għandha dejjem tiġi interpretata bħala “le”. Eżerċizzji żgħar dwar kif tagħti u tirċievi l-kunsens jistgħu jgħinu sabiex issib il-kunfidenza f’dan il-proċess.

Meta tkun qed tagħti jew tirċievi l-kunsens, importanti li int u l-partner/s tiegħek:

• titkellmu minn qabel dwar l-interessi, il-limiti, u l-konfini (boundaries) tagħkom

• taqblu fuq x’inhu aċċettabbli u x’mhuwiex aċċettabbli f’dik is-sessjoni partikolari

• li tistabbilixxu safewords u/jew sinjali

• li tistaqsu lil xulxin kif qed tħossukom waqt u wara x-xena (checking in)

Il-kunsens jista’ jiġi rtirat fi kwalunkwe ħin. Li twaqqaf kollox jew tnaqqas il-pass mhuwiex falliment. Hija komunikazzjoni, u hija importanti għal kull min hu involut. Jista’ jiġri wkoll li l-kunsens jiġi rtirat temporanjament biex tippermettu komunikazzjoni bejnietkom, qabel ma jerġa’ jingħata l-kunsens u tkomplu.

Li jkollok preferenzi kinky ma jfissirx li qed tnaqqas il-limiti tiegħek. Anzi, mhuz talli m’intix qed tnaqqas il-limiti, iżda trid issir espert biex il-limiti tiegħek tagħrafhom u tifhimhom sew.

Prattika tajba li jagħmlu ħafna nies hija li jinnegozjaw qabel il-BDSM. Dan l-innegozzjar mhux dejjem għandu bżonn ikun konverżazzjoni formali u strutturata, speċjalment jekk il-partners ilhom ħafna flimkien u għandhom esperjenza fit-tul. Madankollu, f’kull każ, l-aspettattivi għandhom ikunu ċari anke għal imsieħba b’esperjenza.

In-negozjar jista’ jinkludi:

• x’tip ta’ logħob huwa mixtieq

• il-limiti fiżiċi u emozzjonali

• fatturi li jqanqlu reazzjonijiet negattivi (triggers) jew trawmi tal-passat

• kunsiderazzjonijiet ta’ saħħa fiżika

• sensittivitajiet personali

• kif se jseħħ l-aftercare (il-kura ta’ wara)

Il-limiti jipproteġu lil kull min hu involut. Ir-rispett lejn il-limiti mhuwiex optional. Xi ħadd li jinjora l-limiti mhuwiex qed ikun "dominanti" iżda qed ikun perikoluż.

Fis-sess regolari, il-kliem "le" u "ieqaf" għandhom tifsira sempliċi - IEQAF!. 

Fil-BDSM, dan il-kliem jista’ jkun parti mill-fantasija u allura hemm bżonn kliem ieħor li jfisser l-istess ħaġa. Is-safewords joħolqu din iċ-ċarezza.

Safeword tajba hija:

• faċli biex tiftakarha

• distinta minn kull kelma użata waqt il-logħob

• trid tiġi rispettata immedjatament

Ħafna nies jużaw is-sistema tal-kuluri:

• Aħdar (Green): M’hemmx problema, u nistgħu nkomplu

• Isfar (Yellow): naqqas il-pass jew iċċekkja ftit lill-persuna l-oħra

• Aħmar (Red): ieqaf immedjatament

Flok din is-sistema ta’ kuluri, hawn min jippreferi jagħżel kliem ivvintat jew assurd. Dan jista' jinkludi l-isem ta’ frotta (eż. banana), annimal (eż. panda) jew kelma ivvintata għalkollox. L-importanti hu li s-safewords ikunu memorabbli u faċli biex tiftakarhom anke f'sitwazzjonijiet ta' stimoli sensorjali għoljin (sensory overload). L-użu ta’ safeword ma jfissirx li l-BDSM falla. Anzi, is-safewords huma għodod ta’ komunikazzjoni li jagħmlu l-intensità tal-BDSM sigura u possibbli li sseħħ b’mod healthy.

Nota Importanti dwar Safewords

Ħafna drabi fil-BDSM, is-sensazzjonijiet u l-emozzjonijiet jeskalaw malajr ħafna, u fil-mument jaf ikun diffiċli biex tiftakar jew tifhem is-safewords sakemm ma jkunux ġew miftiehma sew minn qabel. Għaldaqstant, id-diskussjonijiet fuq Is-safewords għandhom jiġu diskussi sew barra l-kuntest tal-logħob tal-BDSM. Id-diskussjoni mhijiex l-ewwel stadju tal-logħob, iżda hija xi ħaġa li trid isseħħ kompletament barra mill-avveniment innifsu.

Jekk persuna li tkun qed tipparteċipa fil-BDSM ma tkunx f’pożizzjoni li tkun tista titkellem minħabba rbit tal-ħalq (gags), logħob tan-nifs, jew stimoli sensorji eċċessivi bħal mużika għolja ħafna, huwa essenzjali li jiġu miftehma safewords mhux verbali. Pero anke jekk dan ma jkunx il-każ, il-qbil fuq safewords mhux verbali xorta huma importanti.

Safewords mhux verbali jistgħu jinkludu:

• Li ttaptap ripetutament b’idejk (simili għas-sinjal li jintuża fil-wrestling meta wieħed iċedi)

• it-tektik tas-swaba’ (snapping of fingers)

• sinjali oħra bl-idejn li jidhru b’mod ċar

• li wieħed iżomm u mbagħad iwaqqa’ oġġett miftiehem minn qabel, bħal per eżempju biċċa ħwejjeġ

Dawn is-safewords għandhom jiġu miftiehma u mifhuma minn qabel. Il-persuna li għandha l-kontroll hija responsabbli li tkun moħħha hemm għalihom il-ħin kollu.

Nota Importanti dwar Safewords Verbali u Mhux Verbali 

Ħafna drabi fil-BDSM, is-sensazzjonijiet u l-emozzjonijiet jeskalaw malajr ħafna, u fil-mument jaf ikun diffiċli biex tiftakar jew tifhem is-safewords sakemm ma jkunux ġew miftiehma sew minn qabel. Għaldaqstant, id-diskussjonijiet fuq Is-safewords għandhom jiġu diskussi sew barra l-kuntest tal-logħob tal-BDSM. Id-diskussjoni mhijiex l-ewwel stadju tal-logħob, iżda hija xi ħaġa li trid isseħħ kompletament barra mill-avveniment innifsu.

Il-kunsens mhuwiex biss verbali. Il-ġisem jikkomunika kontinwament u jista' jibgħat messaġġi anke lil hinn mis-safewords miftiehma.

Il-persuna li taċċetta l-poter trid tibqa’ moħħha dejjem hemm u tieqaf jew tissospendi l-azzjoni immedjatament f’każ ta’:

• Ġisem il-partner jieqaf jiċċaqlaq f’daqqa waħda

• rogħda jew dissoċjazzjoni

• diffikultà biex tieħu n-nifs jew biex tiffoka

• bidliet fil-kulur tal-ġilda

• tensjoni fil-muskoli jew il-persuna tibda tipprova titbiegħed

Li tinjora dawn is-sinjali iwassal għall-periklu.

Il-BDSM mhuwiex nieqes mir-riskju, iżda r-riskju jista’ jonqos permezz tal-għarfien u l-komunikazzjoni.

Il-harm reduction jinkludi:

• tagħlim dwar il-prattiċi qabel ma tipprovahom

• użu ta’ apparat xieraq

• użu ta’ apparat ta’ kwalità għolja li huwa sigur u li għandu inqas ċans li jwassal għal ħsara jew korriment

• evitar tal-logħob waqt li tkun taħt l-influwenza (sakra jew bi prodotti oħra)

• kontroll taċ-ċirkolazzjoni u n-nifs

• li tkun taf meta għandek tieqaf

Żewġ oqfsa komuni fil-"kink":

1. SSC (Safe, Sane, Consensual)

   • Sigur, Sensat, u b’Kunsens

2. RACK (Risk-Aware Consensual Kink)

   • Kink b’Kunsens u b'Għarfien tar-Riskju

Inti għandek is-saħħa li tagħżel dak li jallinja mal-valuri u l-bżonnijiet tiegħek. Li tisma’ lil ġismek huwa parti minn BDSM responsabbli; huwa importanti li ssir taf x’inhuma il-limiti tiegħek.

Il-BDSM jista jaddatta ruħu għal firxa wiesgħa ta’ persuni b’ġisem differenti, newrodiverġenzi (neurodivergencies), livelli ta’ mobbiltà, u kapaċitajiet differenti.

Dan jista’ jinkludi:

• użu ta’ mħaded, supports sabiex televa jew issaħħaħ, jew għamara

• għażla ta’ attivitajiet/logħob li jkollhom impatt anqas f’saħħtu (low-impact), jew li jiffoka fuq is-sensi flok fuq il-ġisem

• Sessjonijiet u xeni aktar qosra

• Negozjar differenti sabiex l-uġiegħ jinbidel

• Waqfiet (breaks) li jkun hemm qbil fuqhom minn qabel

Nies b’diżabilità jew b’mard kroniku ukoll huma attivi sesswalment u allura għandhom posthom u huma milqugħa fil-komunitajiet tal-kink.

L-aftercare hija l-kura fiżika u emozzjonali li ssir wara l-logħob BDSM. Din hija parti essenzjali mill-prattika.

L-aftercare tista’ tinkludi:

• viċinanza fiżika permezz ta’ tgħanniq u mumenti ta' mħabba (cuddling)

• serħan il-moħħ verbalment u smigħ attiv

• grounding (ritorn għar-realtà) permezz ta’ ffokar fuq is-sensi u ritwali ta' de-roleing (bħall-użu ta’ ismijiet proprji minflok titoli użati waqt il-logħob, bħal ‘Sir’ jew ‘Ma’am’)

• ikel (bħaċ-ċikkulata), ilma, u regolazzjoni tat-temperatura (kutri għas-sħana jew xi fan jew air condition biex tiffriska)

• diskussjoni dwar l-esperjenza

• kuntatt ieħor aktar tard (fejn hu possibbli)

Nies differenti jkollhom bżonn aftercare differenti, u l-aftercare m’għandiex għalfejn issir kollha f’daqqa fi ftit ħin. Pereżempju, il-viċinanza fiżika u l-grounding jistgħu jsiru immedjatament wara s-sessjoni, iżda l-konversazzjoni dwar l-esperjenza tista' ssir aktar tard. Importanti li l-aspettativi anke dwar l-aftercare jiġu diskussi minn qabel.

Li tistaqsi kif tinsab il-persuna l-oħra wara l-logħob huwa importanti, speċjalment f’relazzjonijiet fit-tul jew ma’ sieħeb/sieħba regolari. Jekk il-laqgħa hija każwali u hemm l-aspettattiva li jsir kuntatt wara, dan għandu jiġi kkomunikat sew qabel il-BDSM. Minkejja dan, anke jekk din id-diskussjoni ma tkunx saret, għandu jsir kull sforz biex tikkuntattja lil sieħeb jew sieħba tiegħek biex tara kif inhuma, anke jekk ilqajtu b’mod każwali.

Kultant, waqt jew wara xena intensa, persuna submissiva tista’ tidħol f’dak li spiss jissejjaħ subspace — stat mentali hielem u bħal f’ħolma li jista’ jinħass bħala rilaxx, konsenja, jew kalma profonda u paċifika.

F’dan l-istat, tista’ tħossok preżenti immens, emozzjonalment miftuħ(a), u konness(a) b’mod profond mas-sieħeb/sieħba tiegħek jew mal-esperjenza nnifisha. Huwa xi ftit bħal dak is-sens ta’ sliem u meditazzjoni wara l-yoga, jew l-ewforija li jħoss jiġri wara workout mill-aqwa — kollu grazzi għal taħlita ta’ ormoni (endorfini, adrenalina, dopamina, u ossiċitoċina) li jidħlu sew fil-ġisem waqt mumenti ta’ sensazzjoni intensa.

Huwa importanti li tiftakar li s-subspace ma jiġrix lil kulħadd, u qatt mhu xi ħaġa li għandek tiġri warajha jew iġġiegħelha tiġri bil-forza. Kull xena hija unika, u l-għan għandu dejjem ikun il-pjaċir reċiproku, is-sigurtà, u l-konnessjoni — mhux li jintlaħaq stat partikolari. Jekk iseħħ is-subspace, iggawdi l-mument. Jekk le, m’hemm xejn ħażin f’hekk ukoll.

Ippruvaw qablu fuq il-limiti (boundaries) qabel xena, peress li s-subspace jista’ jagħmel lil dak li jkun aktar suġġett li jaqbel għal affarijiet mingħajr ma jkun ikkunsidra l-implikazzjonijiet kollha. Il-persuna dominanti jew dik li qed tmexxi għandha tkun konxja ta’ dan.

Wara sessjonijiet intensivi, xi nies iħossu tnaqqis fl-istat emozzjonali jew fiżiku tagħhom (magħruf bħala drop). Dan jiġri speċjalment jekk ma jkunx hemm aftercare xierqa.

Dan id-drop jista’ jinkludi:

• mistħija u dispjaċir għal li jkun ġara

• niket jew dwejjaq

• irritabbiltà

• sens ta’ vulnerabbiltà

• għeja kbira

Dan iseħħ minħabba bidliet ormonali u emozzjonali. L-aftercare u l-kuntatt ta’ wara jgħinu ħafna. Importanti li wieħed jiftakar li l-partners dominanti jistgħu jesperjenzaw drop ukoll.

Dan id-drop jista’ jseħħ anke jiem wara li tkun intemmet is-sessjoni u jista’ jitqies bħala esperjenza normali wara interazzjoni intensa.

Meta tiġi definita “xena” (scene) fil-BDSM, din tinvolvi perjodu ta’ logħob BDSM  li għandu bidu, nofs, u tmiem. Qabel ma jseħħ dan kollu, in-negozjar għandu jkun ġie konkluż, u l-limiti kollha jkunu ġew stabbiliti u miftiehma minn qabel. Fin-negozzjar ser jiġu stabbiliti r-rwoli ċari, il-kunsens attiv u l-aftercare (kura ta’ wara).

Matul xena:

• Iż-żewġ partijiet jgħinu lil xulxin jidħlu fil-headspace u jneħħu minn moħħhom il-ħsibijiet ta’ kuljum.

• Il-partijiet jibdew ix-xena ppjanata jew intenzjonata.

• Jintlaħaq punt ta’ pjaċir għaż-żewġ partijiet.

• Il-partijiet joħorġu bil-mod mix-xena u jibdew l-aftercare.

Ix-xeni jistgħu jkunu qosra, twal, ippjanati minn qabel, jew spontanji. Iċ-ċarezza u l-kura huma aktar importanti mill-perfezzjoni.

F’każijiet oħra, partikolarment f’relazzjonijiet fit-tul, ir-rwoli tal-BDSM jistgħu jidħlu fil-ħajja ta’ kuljum. F’dawn il-każijiet, ir-rwoli għandhom ikunu definiti b’mod ċar ħafna, u għandu jkun hemm qbil ċar dwar meta jibda u jieqaf il-logħob. Jekk dan ma jsirx, hemm ir-riskju tiċċajpar id-distinzjoni bejn il-ħajja normali u l-logħob BDSM. Jekk din id-distinzjoni tiċċajpar, il-partners fir-relazzjoni ma jibqgħux ugwali, u dik tista tkun problema.

Bosta adulti, inkluż adulti kwir, jagħzlu li jesploraw il-BDSM online jew mill-bogħod.

Il-kink diġitali jista’ jinkludi:

• sessaġġi (sexting) b’limiti nnegozjati minn qabel

• skambju ta’ poter permezz ta’ vuċi jew vidjow

• ġugarelli kkontrollati mill-bogħod (remote-controlled)

• dinamiċi bbażati fuq tasks li jingħataw

• roleplay permezz ta’ tests

In-negozjar huwa essenzjali hawnhekk ukoll. Meta tidħol f'kink diġitali, għandek dejjem tassumi li dak li jiġi ppubblikat fuq l-internet huwa permanenti. Kun konxju ta’ dak li qed tibgħat. Xi nies jużaw apps jew software biex iċajpru partijiet mill-vidjow jew mir-ritratti li qed jintbagħtu, bħal uċuħ jew tattoos li jistgħu jingħarfu. Xi apps joffru wkoll l-għażla li tibgħat ritratti u vidjows li jiskadu u li ma jistgħux jerġgħu jinkisbu wara li jkunu ntwerew, jew wara li jkun għadda ċertu ammont ta’ ħin.

Li tkun sigur online mhux limitat biss għall-kink, iżda fil-każ tal-kink ir-riskji jistgħu jkunu akbar. Dan huwa partikolarment il-każ jekk il-logħob BDSM jinvolvi kink ta’ esibizzjoni jew umiljazzjoni li ma tridhomx jaffettwaw il-ħajja tiegħek ta’ kuljum.

BDSM b'saħħtu ma jinvolvix li timbotta jew tinsisti ma xi ħadd biex imur lil hinn mil-limiti tiegħu. Il-limiti qegħdin hemm għal raġuni.

Li tirrispetta l-limiti ma jagħmilx lil persuna inqas Dominanti jew inqas sottomessa (submissive). Dan jagħmilhom affidabbli u li jixraqilhom il- fiduċja.

L-alkoħol jew is-sustanzi jistgħu iċajpru l-komunikazzjoni. Hawn min jagħżel li jħallat is-sustanzi mal-kink, iżda f’dan il-każ r-riskju ser jiżdied b’mod sinifikanti.

Jekk ser ikunu involuti sustanzi:

• żomm il-logħob aktar ħafif

• evita attivitajiet ta' riskju għoli

• agħmel check-ins waqt li tkun f’sensik (sober)

• ieqaf qabel

Jekk il-kunsens mhux ċar, u persuna waħda jew aktar involuti huma fis-sakra jew taħt l-effett qawwi ta xi sustanza (high), il-logħob tal-BDSM għandu jieqaf.

Ara aktar fuq sess u sustanzi hawn.

Bosta nies jitgħallmu dwar il-BDSM permezz tal-komunità, workshops, jew edukazzjoni bejn il-pari (peer education).

Sorsi tajba ta’ tagħlim jinkludu:

• edukaturi li huma konxji u infurmati dwar il-kink (kink-aware)

• avvenimenti tal-komunità

• qari u riflessjoni

• partners li tista’ tafdahom

Il-pornografija, kif ukoll films u kotba popolari (mainstream), jistgħu jagħtuk ideat iżda mhumiex gwida ta’ kif għandek tagħmel l-affarijiet. Tista’ tieħu pjaċir tara xi ħaġa mingħajr ma neċessarjament tkun trid tagħmilha. Pero tajjeb li ngħidu li jeżisti porno magħmul b’mod etiku u li jikkunsidra l-persuni queer b’mod etiku jista’ jgħin biex tikkunsidra aspetti aktar realistiċi u li tista’ tirrelata magħhom aktar.

Il-BDSM mhuwiex:

• abbuż

• nuqqas ta’ rispett lejn il-kunsens

• prova li hemm xi’ trawma

• xi ħaġa li kulħadd għandu jkun irid

• kompetizzjoni

Li tieħu pjaċir bil-BDSM ma jagħmlekx persuna estremista. Li ma tiħux pjaċir bih ma jagħmlekx persuna boring (bla gost).

Tajjeb li wieħed jikkunsidra kif ser jiddiskuti l-BDSM mal-partner tiegħu. Dawn huma xi mistoqsijiet dwar il-BDSM, li jistgħhu jgħinu diskussjoni kalma, realistika, u inqas intimidanti.

Ipprova staqsi:

• "Hemm xi ħaġa li rajt jew smajt li ġegħlitek taħseb: ‘dik tista’ tkun interessanti!’?"

• "Xi darba ħsibt kif tkun kieku tkun inti dik il-persuna ‘inkarigata’ jew dik li qed ‘issegwi l-ordnijiet’?"

• "Meta nipprovaw xi ħaġa ġdida, x’iġegħlek tħossok sigur u rilassat/a?"

• "Hemm xi ħaġa fil-wishlist tiegħek li għadna ma tkellimniex dwarha?"

• "Għandek xi fantasiji li tippreferi żżommhom biss bħala ħsieb?"

• "X’jgħinek wara li nlestu? Tippreferi li nitgħannqu, toqgħod għall-kwiet, jew nipprepara wkoll xi ħaġa tal-ikel?"

• "Hemm xi ħaġa li inti kurjuż/a dwarha imma tippreferi li naqraw ftit fuqha qabel ma nipprovawha?"

Dawn huma biss modi ta’ kif tibda d-diskors; mhumiex wegħdiet jew rabtiet li bilfors trid tagħmel dawk l-affarijiet.

Jekk tesplora spazji tal-kink pubbliċi jew semi-pubbliċi, bħal avvenimenti tal-kink, play parties, jew dungeons, hemm xi normi li jgħinu biex kulħadd iħossu komdu:

• Staqsi qabel ma tmiss lil xi ħadd jew l-apparat tagħhom.

• Il-pronomi huma importanti; dejjem irrispetta l-identitajiet ta’ ħaddieħor.

• Spazji ta' logħob kwir spiss jagħtu prijorità lis-sigurtà ta’ persuni trans, persuni b’diżabilità, u dawk f’minoranzi oħra. Sib ir-regoli x’inhuma u ara li ssegwihom.

• Li tosserva huwa normali; li tiffissa l-ħars fuq xi ħadd (staring) mhuwiex.

• Ħadd mhu obbligat jilgħab miegħek.

• In-negozjar jista’ jkun bil-fomm, bil-miktub, jew ta’ malajr, iżda xorta għandu jkun ċar.

Komunitajiet tajbin joffru appoġġ qatt iġiegħlu lil xi ħadd iħossu obbligat jew taħt pressjoni biex jagħmel xi ħaġa.